O proxecto Economía Circular – DezaOrienta consistiu na impartición dunha acción formativa no marco do programa de orientación laboral DezaOrienta. A formación achegou aos participantes os fundamentos teóricos e prácticos da economía circular, entendida como un modelo alternativo de produción e consumo baseado na redución, reutilización e valorización dos recursos. A través de sesións dinámicas, traballouse como este enfoque pode aplicarse ao ámbito laboral e ás iniciativas de emprendemento, ofrecendo novas perspectivas para mellorar a empregabilidade e contribuír á sostibilidade económica e ambiental do territorio.

O proxecto “El Cambio Climático Cambia en Comunidad (4C)” realizouse en colaboración coa Asociación Taller de Educación en Valores Alternativos (Colectivo CALA) coa finalidade de fomentar comunidades resilientes fronte á emerxencia climática na comunidade autónoma de Extremadura. A iniciativa combinou formación, acción, comunicación e acompañamento a grupos de persoas comprometidas co medio ambiente, ofrecendo ferramentas e espazos de aprendizaxe para identificar impactos, planificar accións e promover cambios sostibles nas súas comunidades. O proxecto propiciou a reflexión colectiva sobre os desafíos climáticos locais e fomentou a participación activa e coordinada para xerar alternativas concretas que melloren a resiliencia social e ambiental da contorna.

O proxecto “Emprendemento desde a Educación Ambiental” consistiu nun obradoiro práctico e participativo desenvolvido durante as xornadas de “Emprendemento medio natural” promovidas pola Fundación Laboral. A iniciativa centrouse en combinar a educación ambiental co emprendemento, amosando como o coñecemento do medio natural e rural pode convertirse nun eixo para desenvolver proxectos innovadores e sostibles. Durante as sesións, as persoas participantes coñeceron novas ferramentas e recursos aplicables ao ámbito comunitario e ambiental, explorando posibilidades de emprendemento tanto individual como en economía social. O proxecto ofreceu un espazo de aprendizaxe experiencial que favoreceu a reflexión, a planificación e a posta en práctica de ideas orientadas á creación de iniciativas respectuosas co medio ambiente e co territorio.

O proxecto “Del desequilibrio a los sueños compartidos. Creación de narrativas de futuro sostenibles (II)” naceu como continuación da iniciativa “Do Des-Equilibrio aos soños compartidos”, coa intención de dar maior impacto social ás novas narrativas de futuro sostible construídas colectivamente. Para isto, en colaboración coa produtora Illa Bufarda, produciuse a curtametraxe “Raíces. Da utopía en diante”, creada e protagonizada polo grupo de mulleres de Biduído, no Concello de Ames.

A proposta céntrase na visibilización de perspectivas locais, interxeracionais e ecofeministas, amosando alternativas de vida sostible e comprometida coa comunidade. 

O proxecto combina arte, participación cidadá e educación ambiental, ofrecendo un recurso audiovisual que fomenta a reflexión e inspira accións concretas cara un futuro máis xusto e ecolóxico.

O proxecto “RE-PARÁNDONOS: Fedellando na economía circular”, realizado en coordinación co Centro Xove de Almáciga en Compostela, naceu coa finalidade de achegar á mocidade a economía circular mediante un enfoque práctico e participativo. A proposta estruturouse nun programa de actividades semanais desenvolvidas nas instalacións do centro, combinando sesións de reflexión crítica sobre o consumo e os materiais co aprendizaxe e intercambio de técnicas manuais aplicables ao día a día.

Entre as prácticas traballadas destacaron o reaproveitamento e conservación de alimentos, a reparación e arranxo de roupa, a elaboración de produtos de limpeza ecolóxicos, nocións básicas de aromaterapia, así como a creación de xabóns e candeas. Con este enfoque, o proxecto buscou fortalecer a autonomía xuvenil, fomentar valores de sustentabilidade e promover unha cultura comunitaria baseada na reutilización e no coidado dos recursos.

O proxecto “Santiago Utopía: do desequilibrio ao soño compartido” desenvolveuse como unha experiencia piloto de dinamización comunitaria orientada a xerar alternativas que mitiguen ou reduzan os efectos da emerxencia climática sobre a vida das persoas e da súa contorna inmediata. A proposta combinou a reflexión colectiva coa creación de imaxinarios utópicos desde unha perspectiva ecofeminista, tomando como marco o Concello de Santiago de Compostela.

O proceso desenvolveuse con dous grupos diferenciados: un en contorno rural, co colectivo de mulleres de San Xoán de Fecha, e outro no ámbito urbano, no Centro Cívico Maruxa e Coralia, situado no casco histórico da cidade. A través de encontros participativos, ambos grupos elaboraron listaxes de accións posibles a nivel comunitario e municipal para avanzar cara a un modelo de cidade sostible e inclusiva.

O proxecto culminou cun encontro final conxunto, no que se compartiron as propostas xeradas e se abriu un diálogo directo coa administración local, favorecendo a visibilización do traballo realizado e a posibilidade de integrar estas ideas nos procesos de planificación municipal.

O proxecto Agro da Pobra implicou á veciñanza do Concello de A Pobra do Caramiñal na comercialización de excedentes das súas hortas familiares, creando un espazo de cooperación entre produtores locais e comercio de proximidade. Esta iniciativa interdisciplinar abordou cuestións de xénero, ámbito laboral e sustentabilidade ambiental, promovendo prácticas de agroecoloxía e fortalecendo a economía local. Como resultado, constitúese a asociación Agro da Pobra, consolidando un modelo de consumo responsable, participación cidadá e valorización dos recursos locais que busca conectar á comunidade co seu territorio e co medio ambiente de forma sostible.

Proxecto que ten por obxectivo implicar á mocidade participante na busca de alternativas á crise ecosocial.

A través de sesións mensuais o grupo de rapazada coñece as distintas dimensións da crise ecosocial, dende o global até o local, analizando causas e consecuencias. A partir destas aprendisaxes, deseñan e desenvolven accións de sensibilización na súa contorna inmediata, promovendo unha cultura de participación activa e responsabilidade ambiental.

O proxecto tamén inclúe un campamento ecoloxista intensivo durante unha semana no verán, onde as participantes profundizan en hábitos de vida sustentables e aprendizaxes prácticas sobre medio ambiente e sustentabilidade, empregando a arte e a creatividade como ferramentas para reflexionar sobre modelos de vida alternativos e respectuosos co planeta.

O proxecto “Do desequilibrio aos soños compartidos. Narrativas de futuro sostible” é unha iniciativa colaborativa entre o Grupo de Investigación SEPA-Interea (USC), a Cooperativa Sen Ánimo de Lucro Feitoría Verde e a compañía teatral Chévere, cun enfoque interxeracional.

O seu obxectivo é sensibilizar sobre a emerxencia ecosocial e fomentar a acción creativa cara alternativas sostibles, implicando rapazada e persoas da terceira idade. Estrutúrase en dúas fases:

1. Fase inicial: traballo por separado dos dous grupos, adquirindo coñecementos teórico-prácticos sobre estratexias para afrontar as crises climática e social.
   
   
2. Fase conxunta interxeracional: creación de narrativas de futuro sostible a través do teatro, combinando aprendizaxes e experiencias de ambos grupos.

O proxecto culmina cunha acción final conxunta, na que se representa o proceso seguido e se empregan diversas ferramentas artístico-lúdicas. Posteriormente, nunha ampliación en 2024, os relatos xerados polas participantes serviron de base para elaborar un guión e gravar unha curtametraxe dun futuro utópico, coa colaboración da produtora Illa Bufarda.