O proxecto “Del desequilibrio a los sueños compartidos. Creación de narrativas de futuro sostenibles (II)” naceu como continuación da iniciativa “Do Des-Equilibrio aos soños compartidos”, coa intención de dar maior impacto social ás novas narrativas de futuro sostible construídas colectivamente. Para isto, en colaboración coa produtora Illa Bufarda, produciuse a curtametraxe “Raíces. Da utopía en diante”, creada e protagonizada polo grupo de mulleres de Biduído, no Concello de Ames.

A proposta céntrase na visibilización de perspectivas locais, interxeracionais e ecofeministas, amosando alternativas de vida sostible e comprometida coa comunidade. 

O proxecto combina arte, participación cidadá e educación ambiental, ofrecendo un recurso audiovisual que fomenta a reflexión e inspira accións concretas cara un futuro máis xusto e ecolóxico.

O proxecto “RE-PARÁNDONOS: Fedellando na economía circular”, realizado en coordinación co Centro Xove de Almáciga en Compostela, naceu coa finalidade de achegar á mocidade a economía circular mediante un enfoque práctico e participativo. A proposta estruturouse nun programa de actividades semanais desenvolvidas nas instalacións do centro, combinando sesións de reflexión crítica sobre o consumo e os materiais co aprendizaxe e intercambio de técnicas manuais aplicables ao día a día.

Entre as prácticas traballadas destacaron o reaproveitamento e conservación de alimentos, a reparación e arranxo de roupa, a elaboración de produtos de limpeza ecolóxicos, nocións básicas de aromaterapia, así como a creación de xabóns e candeas. Con este enfoque, o proxecto buscou fortalecer a autonomía xuvenil, fomentar valores de sustentabilidade e promover unha cultura comunitaria baseada na reutilización e no coidado dos recursos.

O proxecto “Santiago Utopía: do desequilibrio ao soño compartido” desenvolveuse como unha experiencia piloto de dinamización comunitaria orientada a xerar alternativas que mitiguen ou reduzan os efectos da emerxencia climática sobre a vida das persoas e da súa contorna inmediata. A proposta combinou a reflexión colectiva coa creación de imaxinarios utópicos desde unha perspectiva ecofeminista, tomando como marco o Concello de Santiago de Compostela.

O proceso desenvolveuse con dous grupos diferenciados: un en contorno rural, co colectivo de mulleres de San Xoán de Fecha, e outro no ámbito urbano, no Centro Cívico Maruxa e Coralia, situado no casco histórico da cidade. A través de encontros participativos, ambos grupos elaboraron listaxes de accións posibles a nivel comunitario e municipal para avanzar cara a un modelo de cidade sostible e inclusiva.

O proxecto culminou cun encontro final conxunto, no que se compartiron as propostas xeradas e se abriu un diálogo directo coa administración local, favorecendo a visibilización do traballo realizado e a posibilidade de integrar estas ideas nos procesos de planificación municipal.

O proxecto “Mellorar os procesos participativos da Infancia e a Adolescencia no municipio” forma parte da iniciativa interuniversitaria “Deseño e validación dunha caixa de ferramentas para promover a participación da infancia a nivel local”, financiada polo Ministerio de Ciencia, Investigación e Universidades e desenvolvida conxuntamente pola Universidade da Coruña, Universitat de Barcelona, UNED e Universidad de Sevilla.

O obxectivo principal é dispoñer dunha caixa de ferramentas útil para concellos e entidades, que permita reflexionar, organizar e mellorar as prácticas en torno á participación infantil e xuvenil nos procesos municipais. Neste marco, a nosa participación consistiu na dinamización de dúas sesións participativas no Concello de Teo, nas que se implicaron profesionais e persoas con vínculo directo coa infancia e adolescencia do municipio. As sesións, cunha duración total de 6 horas distribuídas en dous días, permitiron compartir experiencias, identificar retos e validar propostas que posteriormente se integrarán na caixa de ferramentas común.

O proxecto “Videofórum – Mátria” desenvolveuse no contexto da celebración do Día Internacional pola Eliminación da Violencia contra as Mulleres – 25N, promovida polo Concello de Padrón. A iniciativa centrouse na organización dunha sesión de videofórum arredor da proxección da película Mátria, co obxectivo de crear un espazo seguro e participativo no que veciñanza e público asistente puidesen debater, identificar e compartir reflexións sobre as distintas formas en que se manifesta a violencia machista.

A dinamización posterior á proxección buscou favorecer a participación activa, fomentar a conciencia crítica e construír colectivamente posibles estratexias de prevención e acción fronte a esta problemática social. O proxecto insírese nas áreas de igualdade e participación cidadá, poñendo en valor o cinema como ferramenta educativa e de transformación social.

O proxecto Tocar ao Concello (TAC) naceu como resposta á perda de participación social, ao debilitamento do tecido comunitario e á desaparición progresiva do patrimonio material e inmaterial no Concello da Veiga (Ourense), procesos agravados pola pandemia da Covid-19. Desenvolvido en colaboración coa Cooperativa Outonía e a Asociación Otra Escuela, puxo o foco na dinamización comunitaria e na recuperación dos valores culturais a través de diferentes accións como a creación dun grupo motor de mobilización, a realización dun diagnóstico participativo, a posta en marcha dunha oficina ambulante de acompañamento e un mapeo social. O proceso culminou co Festival Art-Part, o primeiro festival artístico e participativo do rural da provincia de Ourense, que se converteu nun espazo festivo e comunitario no que a música, os roteiros e os obradoiros serviron como ferramentas de cohesión social e de posta en valor das potencialidades locais. O proxecto conseguiu implicar á veciñanza no fortalecemento da vida comunitaria e abrir un novo camiño para a participación cidadá no rural galego.

O proxecto Agro da Pobra implicou á veciñanza do Concello de A Pobra do Caramiñal na comercialización de excedentes das súas hortas familiares, creando un espazo de cooperación entre produtores locais e comercio de proximidade. Esta iniciativa interdisciplinar abordou cuestións de xénero, ámbito laboral e sustentabilidade ambiental, promovendo prácticas de agroecoloxía e fortalecendo a economía local. Como resultado, constitúese a asociación Agro da Pobra, consolidando un modelo de consumo responsable, participación cidadá e valorización dos recursos locais que busca conectar á comunidade co seu territorio e co medio ambiente de forma sostible.

O Foro de Participación de Infancia e Adolescencia (FOPIA) é un órgano municipal inscrito no programa internacional Cidades Amigas da Infancia, liderado por UNICEF, que ofrece á mocidade un espazo para expresarse, reflexionar e influír nas decisións que afectan á súa vida cotiá e á contorna que habitan.

No FOPIA, a rapazada ten a oportunidade de debater sobre cuestións que lles afectan directamente, construír propostas para o seu concello e participar activamente en accións de mellora da contorna próxima. Ao mesmo tempo, aprenden a observar e analizar as consecuencias das súas accións individuais e colectivas, fomentando relacións de bo trato e fortalecendo a calidade de vida da comunidade. Este espazo promove a participación cidadá de forma significativa, cultivando valores de cooperación, responsabilidade e compromiso coa sociedade e o seu contorno.

Proxecto que ten por obxectivo implicar á mocidade participante na busca de alternativas á crise ecosocial.

A través de sesións mensuais o grupo de rapazada coñece as distintas dimensións da crise ecosocial, dende o global até o local, analizando causas e consecuencias. A partir destas aprendisaxes, deseñan e desenvolven accións de sensibilización na súa contorna inmediata, promovendo unha cultura de participación activa e responsabilidade ambiental.

O proxecto tamén inclúe un campamento ecoloxista intensivo durante unha semana no verán, onde as participantes profundizan en hábitos de vida sustentables e aprendizaxes prácticas sobre medio ambiente e sustentabilidade, empregando a arte e a creatividade como ferramentas para reflexionar sobre modelos de vida alternativos e respectuosos co planeta.